Hugot nga gikondenar sa Department of Health (DOH) ang walay hunong ug padayon nga malimbongon nga mga estratehiya sa pagpamaligya nga gigamit sa mga kompanya sa produktong “vape.”
Tungod niini, ang DOH nagsugyot og hingpit nga pagdili, o total ban sa paggamit ug pagbaligya sa vape sa tibuok nasud aron mapanalipdan ang panglawas sa publiko, labi na ang mga batan-on.
Sumala sa DOH, ang vape adunay lain-laing mga kemikal nga delikado kaayo sa panglawas sa bisan kinsa nga mogamit niini.
Dugang pa, kini nakadani sa mga batan-on tungod sa ilang mga kolor nga pakete ug sa lain-laing mga flavor nga gitanyag niini.
Base sa datos gikan sa 2019 Global Youth Tobacco Survey, makaalarma nga usa sa matag pito ka batan-ong Pilipino nga nag-edad og 13 hangtod 15 anyos ang naggamit na og vape.
Makapasubo usab nga ang unang kaso sa kamatayon sa Pilipinas nga direktang nalambigit sa duha ka tuig nga paggamit sa vape natala.
Kini usa ka klaro nga indikasyon sa mga risgo sa panglawas nga gipahinabo sa vape.
Gipasiugda sa DOH nga ang padayon nga paggamit sa vaping, sama sa mga sigarilyo, hinungdan sa grabe nga mga problema sa panglawas, lakip ang sakit sa kasingkasing, lainlaing mga klase sa kanser, ug grabe nga mga sakit sa baga.
Sa pagkakaron, ang DOH Health Promotion Bureau nagpadayon sa paghatag og edukasyon sa mga komunidad, eskwelahan, ug mga trabahoan.
