Nipagawas og pasidaan ang Department of Health (DOH) bahin sa peke nga social media page nga bakak nga naglambigit sa ahensya sa usa ka “nutritional milk” nga produkto nga giingong makaayo sa chronic insomnia.
Ang peke nga page, nga nagpakaaron-ingnon nga DOH, nagsugyot nga ang pagkonsumo niini nga produkto matag adlaw kay daw makatabang sa pagpalambo sa kahimsog ug kalidad sa pagkatulog.
Sa usa ka pamahayag, giklaro sa DOH nga wala kini nag-endorso o nag-ila sa produkto nga gi-promote sa fake page.
Ug gipasiugda sa ahensya nga ang insomnia adunay lainlaing hinungdan ug wala’y dinaliang tambal.
Gidugang sa ahensya nga ang epektibong pagtambal nanginahanglan ug napamatud-ang mga pamaagi sama sa saktong sleep hygiene, therapy, ug giya sa mga medical expert.
Gi-report sa DOH ang fake page ngadto sa Department of Information and Communications Technology (DICT) aron tangtangon ug giawhag ang publiko nga sundon lang ang mga opisyal nga social media account sa DOH.
