Gitugyan na karon sa Department of Justice sa panel of prosecutors ang pagdumala sa reklamo kalabot sa pagkahanaw sa mga sabungeros. Kini maoy gipahibawo sa kasamtangang kalihim sa maong departamento nga si Secretary Jesus Crispin Remulla kalabot sa iyang komento sa nasangpit nga kaso.
Nagdumili usab kini sa paghatag og pamahayag kalabot sa ‘missing sabungero case’ tungod kay matud niya aktibo na kini nga kaso.
Buot ipasabot nga ang panel of prosecutors maoy nagdumala niini nunot sa pagkompleto sa ebalwasyon sa reklamo nga gisang-at sa kabanay sa mga missing sabungero, ug tugotan lang ang duha ka habig nga makasulti atol sa gikatakdang preliminary investigation sa kaso.
Kahinumduman nga bag-o lang gipasaka sa kabanay sa mga missing sabungero ang kasong serious illegal detention ug multiple murder batok sa negusyante nga sila si Charlie Atong Ang, Gretchen Barretto, ug uban pa, diin ang pasiuna nga imbestigasyon gitakda sa sunod semana, Septiyembre 18, ug gipaabot nga posibleng motungha ang duha ka habig.
Samtang, si Justice Assistant Secretary Mico Clavano usab nipahibawo nga ang managsuong Julie ug Elakim Patidongan kinahanglan pa nga pasakaan og kaso sa dili pa ma-discharge aron madala isip ‘state witnesses’, kay matod niya nga kung gusto sa duha ka ‘whistleblower’ nga mapaubos sa nasangpit nga protection program, kinahanglang moagi una sila sa nahisgutang proseso.
