Moabag ang buhatan sa Department of Labor and Employment sa dakbayan sa Mandaue, aron mapaspasan ang pagpanglimpyo sa nagkadaiyang barangay nga apektado sa baha.
Matud ni Mandaue City Mayor Thadeo “Jonkei” Ouano, nga dul-an 10 ka mga barangay ang kinahanglan pang limpyohan, hilabi na kadtung doul sa Butuanon river.
Gibutyag usab sa Mayor nga pinaagi sa programa sa DOLE, aduna silay 20 ngadto na sa 30 ka mga indibidwal ang tahasan aron sa pagpanglimpyo sa mga sudlunon nga bahin sa barangay nga dili gayud masulod sa mga heavy equipments.
Moabut sa 200 ngadto na sa 300 ka mga indibidwal ang posibleng makabenepisyo sa programa nga gipasiugdahan sa DOLE.
Gihimug-atan usab ni Ouano, nga kinahanglang pilion gayud sa mga barangay ang katung tataw nga mo limpyo og kugihan ug dili katong mga kaila ra ang pilion.
Una na usab gipahibalo sa Mayor nga aduna pay pipila ka mga kadalanan ang dili pa malimpyohan pinaagi sa pagpaflushing og tubig gumikan kay aduna pay mga residente nga wala pay suplay sa tubig.
