Nasagmuyo si Department of Public Works and Highways (DPWH) Secretary Vince Dizon human niya nakita ang wala pa nahuman nga mga proyekto sa Bicol Region, lakip na kadtong gisalig sa mga kontrobersyal nga kontraktor.
Gisugat si Dizon sa duha ka dagkong poste sa Malabog Flyover, nga gisugdan pagtukod niadtong 2021.
Nahibal-an nga ang proyekto adunay P159 milyon nga badyet, diin 12% ra sa 700-metros nga flyover ang nahuman.
Dugang pa, nga ang proyekto gidumala sa HI-TONE Construction and Development Corp., nga gipanag-iya ni Christopher Co, ug ang Alpha and Omega General Contractor and Development Corp., nga gipanag-iya sa mga Discaya.
Si Co igsoon sa kanhi kongresista ug karon pugante nga si Zaldy Co.
Gitini ni Dizon, nga ang duha ka kompanya nalakip sa 15 ka kontraktor nga giingong nagkontrolar sa halos 20% sa mga proyekto sa flood control sa tibuok nasud.
Gipahibalo usab sa hepe sa DPWH nga ang proyekto sa flyover i-rebid ngadto sa usa ka bag-ong kontraktor sa Pebrero.
Dugang pa, gimandoan ni Dizon ang paspas nga pag-ayo sa usa ka bahin sa Maharlika Highway sa Albay sa dili pa ang Semana Santa, aron malikayan ang grabeng trapiko.
