CENTRAL VISAYAS-Nanawagan ang Department of Social Welfare and Development sa Central Visayas (DSWD-7) sa mga local government units (LGUs) arun nga makigsabot sa ahensya sa pagpaambit sa datos gikan sa Listahanan 3.
Matud kini sa Listahanan Regional Program Coordinator sa DSWD-7 nga si Lester Laborte aron paspas ang pagpatuman sa Republic Act No. 11552 o “An Act Extending and Enhancing the Implementation of the Lifeline Rate.”
Ang ‘Lifeline Rate Act’ usa ka balaod nga naghatag og subsidyo o ‘discounted rates’ ngadto sa ubos nga kita, marginalized electric consumers, sama sa mga benepisyaryo sa 4Ps ug Listahanan-identified nga pobre.
Sa pagkakaron, si Laborte niingon nga wala pay bisan usa ka LGU sa Central Visayas ang nahatagan sa Listahanan database, sanglit kinahanglan pa silang mopailawom sa memorandum of agreement (MOA) uban sa ahensya.
Giasoy pa ni Laborte nga anaa nay lima ka pending application alang sa MOA ug aduna pa’y nagpadayon kapin niini.
Gawas niini, nanghatag usab ang ahensya og technical assistance sa maong mga LGUs aron paspas ang pagpatuman sa MOA.
Nasayran, nga ang Rehiyon 7 adunay 13 ka ‘power distribution utilities’ nga mag-implementar sa programa, diin ang mga konsumidor mamahimong makatagamtam sa subsidy nga 20-100 porsyento.
Sa pagpatuman sa RA 11552, ang 4Ps ug Listahanan-identified poor nga pamilya ra ang maka-avail sa programa sugod sa Septiyembre.
