Giinister ni Department of Social Welfare and Development (DSWD) Secretary Rex Gatchalian nga ang Ayuda para sa Kapos ang Kita o AKAP Program kay dili pork barrel ug dili responsibilidad sa mga opisyal sa barangay ang pagdeterminar sa listahan sa mga benepisyaryo sa programa.
Sa usa ka pamahayag, gipasiugda sa kalihim nga ang tanang field offices sa DSWD sa tibuok nasod nagserbisyo sa mga nanginahanglan, walk-in client man sila o gi-refer sa mga opisyal sa lokal nga kagamhanan.
Dugang katin-awan ni Sec. Gatchalian nga ang ilang mga social worker maoy nagproseso sa mga aplikasyon alang sa AKAP ug nagtino sa kantidad sa hinabang nga ihatag alang sa mga kwalipikadong benepisyaryo.
Gihimo sa kalihim ang pagklaro nunot sa naunang pamahayag ni retired Supreme Court Senior Associate Justice Antonio Carpio kinsa mitandi sa AKAP cash assistance ngadto sa kontrobersyal nga pork barrel system ug nirekomendar nga ang mga barangay officials mosumiter sa listahan sa mga benepisyaryo.
