Giklaro sa Department of Social Welfare and Development (DSWD) nga ang mga kwalipikado nga drayber sa pampublikong transportasyon dili kinahanglan og sertipikasyon sa Comelec aron makadawat og tabang pinansyal.
Gihimo sa DSWD ang pagklaro subay sa mga report bahin sa cash relief sa ahensya, human ang mga drayber sa habal-habal giingong gipangayoan og certification form gikan sa opisina sa Comelec sa Cebu City.
Sumala sa tigpamaba sa DSWD nga si ASec. Irene Dumlao, lisensya lang ang gikinahanglan gikan sa mga drayber aron mapadali ug malikayan ang dugang nga kalisud sa pagkuha og cash aid.
Giklaro usab ni Dumlao nga ang P5,000 nga financial assistance ubos sa Assistance to Individuals in Crisis Situation (AICS) para lamang sa mga kwalipikado nga drayber sa PUV nga naapektuhan sa bag-ohay nga pagsaka sa presyo sa lana.
Matod niya nga ang ubang mga sektor makakuha usab og cash relief sa mga opisina sa DSWD ubos sa programa sa AICS.
