Mitaho ang Department of Social Welfare and Development nga walay internally displaced persons (IDPs) sa Negros Island Region bisan pa sa balik-balik nga pagbuto sa bulkang Kanlaon.
Base sa report sa ahensya, walay nahitabong evacuation o pagbakwit sa mga komunidad nga naglibot sa bulkan.
Kini naglakip sa La Castellana, Canlaon City, Murcia, La Carlota City, ug Bago City.
Bisan pa niini, ang Quick Response Teams (QRTs) nagpabilin sa lugar aron monitoron ang sitwasyon sa mga komunidad ug makig-alayon sa mga lokal nga gobyerno.
Sumala sa DSWD, andam sila nga mohatag og teknikal nga tabang ug posibleng pagdugang sa mga kahinguhaan kung gikinahanglan.
Gawas sa mga giandam nga family food packs, ang ubang mga logistics sa DSWD sama sa mobile kitchens, mobile command centers, ug water filtration trucks gikatakda usab nga ipadala sa mga apektadong komunidad.
Niadtong miaging tunga-tunga sa tuig, ang alerto sa bulkang Kanlaon gipaubos sa Alert Level 2 ug ang mga apektadong residente gitugotan nga makabalik sa ilang mga panimalay.
