Nakapang-apud-apod ang Department of Social Welfare and Development (DSWD) og labing menos P27 milyon nga kantidad sa humanitarian assistance ngadto sa mga pamilyang naapektuhan sa Bagyong Basyang.
Sumala sa tigpamaba sa DSWD nga si Asec. Irene Dumlao, ang humanitarian assistance nga naapod-apod ngadto sa mga apektadong residente gilangkoban sa mga family food packs, ready-to-eat food boxes ug uban pang non-food items nga naapod-apod ngadto sa mga evacuation centers.
Gawas niini, ang ilang mga ahensya nakahatag usab og tabang sa Misamis Occidental, Misamis Oriental, ingon man sa Agusan del Norte, Surigao del Norte, Surigao del Sur ug ingon man sa Dinagat Islands.
Samtang, kapin sa 3.5 milyon nga FFP ang kasamtangang gibutang sa mga bodega sa ilang mga regional office para sa dali nga pagtubag sa mga panginahanglan sa publiko tungod sa bagyo.
Ubos sa mando ni Presidente Ferdinand R. Marcos Jr., si Department of Social Welfare and Development (DSWD) Secretary Rex Gatchalian mibisita niadtong Sabado sa mga Dakbayan sa Iligan ug Cagayan de Oro (CDO) sa Amihanang Mindanao nga lakip sa mga naapektuhan sa kusog nga ulan ug baha nga dala sa Bagyong Basyang.
Gawas sa hinanaling tabang sa pagkaon, gipasiugda ni Secretary Gatchalian nga ang tabang pinansyal pinaagi sa programa sa Emergency Cash Transfer (ECT) mosunod kung makompleto na sa mga local government units (LGUs) ang profiling sa mga apektadong pamilya.
Gibisita usab niini ang duha ka evacuation center ug gisusi ang usa ka tulay nga daling mabahaan sa Dakbayan sa Iligan, uban ni Mayor Frederick Siao, aron mas masabtan ang gidak-on sa kadaot ug ang mga panginahanglanon sa imprastraktura sa siyudad.
