Nagpagawas ang Department of Trade and Industry (DTI) og ‘Gabay sa Pamimili ng School Supplies’ alang sa School Year 2026–2027 aron matabangan ang mga mamalitay sa pagtandi sa mga presyo taliwala sa pagpangandam sa mga pamilya alang sa pag-abli sa klase.
Sumala sa DTI, ang maong giya nagtumong sa paghatag og sumbanan sa kasagarang gipalit nga mga gamit sa eskwelahan sama sa mga notebook, papel, lapis, ballpen, krayola, eraser, sharpener, ug ruler.
Ania ang dagan sa presyo base sa advisory sa ahensya:
Notebooks: P13 hangtod P52
Papel: P13 hangtod P69.75
Lapis ug Ballpen: P3 hangtod P27
Krayola: P12 hangtod P114
Eraser, Sharpener, ug Ruler: P8 hangtod P69
Gisaysay sa DTI nga gipagawas kini aron magiyahan ang publiko sa pagpili og barato nga mga gamit sa eskwelahan samtang gisiguro gihapon ang kalidad ug husto nga pag-label sa mga produkto.
Gitambagan usab sa ahensya ang mga konsumidor nga susihon pag-ayo ang mga detalye sa produkto aron masiguro nga luwas ug makatubag kini sa panginahanglan sa mga estudyante.
