CEBU – Duha ka giingong lider sa gang, kinsang mga grupo nalambigit sa kagubot sa Talisay City, Cebu, nasikop sa hot-pursuit operation gabii Lunes, Oktubre 3, 2022.
Giila ni Police Lieutenant Colonel Randy Caballes, hepe sa Talisay City Police Station, ang duha nga sila si Mark Mitchell Canillo, 18, residente sa Barangay Maghaway ug Jay-R Caballero, 18, taga Barangay Tabunok.
Dugang pa, nga si Canillo giingong lider ug founder sa Barangay Maghaway 16 gang samtang si Caballero maoy lider sa Batang Dike Gang, kung diin nasakmit sa kapolisan gikan sa duha ang duha ka .38 revolver.
Gi-rescue usab sa kapolisan ang pipila ka sakop sa gang, nga mga menor de edad.
Nasayran nga ang duha ka grupo nalambigit sa kagubot batok sa ubang mga grupo sa Barangay Linao niadtong Oktubre 2, diin usa ka miyembro sa gang ang naangol, dili tungod sa away kon dili tungod kay nadasmagan sa miagi nga motorsiklo samtang nagpadayon ang komosyon sa kadalanan.
