CEBU CITY — Posibleng mag-atubang og dismissal ang duha ka mga pulis kinsang gituohang nalambigit sa tigbakay niadtong nakalabay nga weekend sa Sitio Caimito, Brgy. Lataban, lungsod sa Liloan, Cebu.
Kasamtangang gipangita sa mga tinugyanan sa balaud ang nahisgutang mga police officers nga silang Police Staff Sergeant Ronnie Cabra gikan sa Regional Mobile Forces Battalion-7; ug Police Master Sgt. Michael Cortes sa Lapu-Lapu City PNP kinsang miikyas atol sa pagpangronda.
Matud ni Police Regional Office (PRO)-7 Director Brig. Gen. Albert Ignatius Ferro nga usa ka dakong kalapasan ang nabuhat sa gipangitang mga kapulisan kung diin natayming kini sa pagbisita ni PNP Chief Gen. Debold Sinas sa nakalabay nga weekend.
Gipaabot karon ni Ferro ang report gikan sa Cebu Provincial Police Office (CPPO) aron sugdan ang imbestigasyon kabahin niini.
Atol sa operasyon sa Provincial Intelligence Unit niadtong Nobyembre 21, moabot sa 11 ka mga lalaki ang nasikop human naabtang nagpahigayon og tigbakay sa maong lugar.
Nagkanayon si Police Lt. Col. Randy Korret nga gitumbok sa usa sa mga dinakpan nga ang duha ka mga nahisgutang pulis mao ang gituohang nagpaluyo sa maong tigbakay. (Report by Bombo Joann Gantalao/GN)
