Patay ang duha ka pulis ug usa ka personnel sa Bureau of Corrections (BuCor) human sa pagpamusil sa Barangay Irawan,Puerto Princesa gabii sa Biyernes Santo, Abril 3.
Sumala sa mga residente nga mitambong sa usa ka lamay sa maong lugar, nagsugod ang insidente sa usa ka komprontasyon tali sa mga pulis ug pipila ka mga tawo alas 9:40 sa gabii.
Gikataho nga mibiya una ang mga pulis, apan mibalik uban ang dugang pwersa o backup, nga misangpot sa laing komprontasyon hangtod nga nahimong pinusilay.
Ang mga namatay giila nga sila si Police Staff Sergeants Ryan Cris Cabaña ug Jayson Fernandez, nga parehong nadestino sa Puerto Princesa City Police Station 2 (PS-2), ug si Jerson Ojario Talon, personnel sa BuCor.
Gikompirma sa Puerto Princesa City Police Office (PPCPO) nga nahitabo ang insidente alas 10:30 sa gabii sa maong adlaw sa Zone 13, Barangay Irawan.
Dihang nadawat ang report, dayon nagmando si City Director PCOL Christine M. Tabdi kang PMAJ Ray Aron D. Elona, Station Commander sa Police Station 2, nga ipahigayon ang usa ka lawom ug komprehensibong imbestigasyon.
Sa kasamtangan, ang Police Station 2, uban sa ubang yunit sa PPCPO, Puerto Princesa City Forensic Unit (PPCFU), ug uban pang mga ahensya, nagpadayon sa masusing imbestigasyon aron matino ang motibo sa krimen ug mailhan ang mga suspek.
Padayon usab ang pagkuha og testimonya sa mga saksi, pakig-coordinate sa mga residente, pagrepaso sa CCTV footage, ug detalyadong pag-eksamin sa crime scene isip kabahin sa imbestigasyon.
Giandam usab sa kapulisan ang pag-activate sa usa ka Special Investigation Task Group (SITG) aron mas mapokus ang imbestigasyon ug mapalig-on ang koordinasyon sa nagkadaiyang law enforcement units alang sa paspas nga resolusyon sa kaso.
