CEBU PROVINCE – Patay ang duha ka mga indibidwal human nga madasmagan sa usa ka crane truck sa national highway sa Barangay Linao-Lipata, lungsod sa Minglanilla.
Giila ang mga biktima nga sila si Jesus Panlon Adolfo, Jr. ug si Jinky Concepcion, pulos mga residente sa Barangay Punay, lungsod sa Aloguinsan.
Gisaysay ni Police Staff Master Sergeant Jenil Atir sa Minglanilla PNP, nga sakay sa motorsiklo ang duha sa dihang mi-overtake kini sa crane truck ug nawad-an ug balansi.
Giingong nalatayan ang ulo sa mga biktima hinungdan sa ilahang hinanaling kamatayon.
Sa pagkakarun, nagtingkagol sa Minglanilla PNP detention cell ang suspek nga si Tomas Bas, 55 anyos, ug taga Barangay Subangdako, syudad sa Mandaue.
Gipaabot sa kapulisan ang pamilya sa mga biktima alang sa pagpasaka ug kaso batok sa naasoy nga truck driver.
