CEBU CITY-Patay ang duha ka indibidwal sa nahitabong pagpamusil sa Lucas Compound, Barangay Bayabas Extension, Barangay Punta Princesa, ning dakbayan sa Sugbo pasado alas 7 sa gabii, Pebrero 18, 2025.
Ang mga nakalas mao sila si alyas Nicardo, 59-anyos ug alyas George, 39-anyos nga susamang mga residente sa naasoy nga dapit.
Samtang nadakpan dayon ang suspek sa pagpamusil nga si alyas Kevin human kini nasugatan sa kapulisan sa Mambaling Police Station 11.
Basi sa imbistigasyon sa kapulisan, sa wala pa ang pagpamusil kay nag-amok ang suspek ug giingong gikulata ang anak niini nga tres anyos hinungdan nga nakaangkon og bun-og ang bata ug sa dihang nakakita ang biktima nga si Nicardo, nga silingan iya kining gilayog apan tungod sa kakusgan sa suspek ug gibunalan og ‘bat’ sa kadaghang higayon nga miresulta sa kamatayon ni Nicardo.
Sa pagsuway og sibat sa suspek, misulod kini sa balay sa ikaduhang biktima nga si George, nga usa ka retired US Navy nga adunay dala nga armas ug gituohang midepensa sa kaugalingon apan nailog ug maoy gigamit sa pagpusil kaniya.
Pag-abot sa mga miresponding mga sakop sa kapulisan, giingong gipusil sa tiil ug tuhod ang suspek ug maoy resulta sa pagkahagba niini.
Kasamtangang anaa na karon sa Cebu City Medical Center ang suspek tungod sa iyang nahiaguman nga pinusilan.
