CEBU – Nagpundok ang mga nagkadaiyang raliyista sa dalan Colon atol sa paghandom sa Bonifacio Day karung adlawa.
Mukabat sa dul-an 500 ka mga indibidwal gikan sa nagkadaiyang progresibong grupo ang misalmot sa maong kalihokan diin padayon nga nakigbisog batok sa mga dili makatarunganon nga polisiya sa nasudnong nga pangagamhanan.
Sa pakighinabi sa Bombo News Team kang Dennis Derige, ang coordinator sa Partidong Manggagawa Cebu Chapter, gibutyag niini nga gilusad nila ang maong kalihokan kauban ang uban pang mga labor groups arun nga ipadayag ang ilahang padayon nga panawagan sa gobyerno sa paghatag ug pagtagad sa mga mamumuo nga Pilipino.
Matud pa, hangtud karun daghang mga mamumuo ang nakasinati ug pagpangabuso sa ilahang mga employer ingon man ang paghatag ug dili makatarunganon nga sweldo hinungdan nga padayon ang kalisod sa mga Pilipinong mamumuo.
Giawhag niini ang katawhang Pilipino nga ipadayon ang pakigbisog batok sa mga mapahimuslanon ingon man pagtingog batok sa mga polisiya sa gobyerno.
