MANDAUE CITY,CEBU-Nasakmit sa duha ka managlahing buy-bust operation ang mga pakete sa gituohang shabu nga mobalor og dul-an sa P10 milyones nga gipahigayon sa Mandaue City Police sa Barangay Subangdaku ug Centro alas 10:30 sa gabii Miyerkules, Hunyo 19, 2024.
Kini ang gikompirma ni Police Lieutenant Colonel Mercy Villaro, ang tigpamaba sa Mandaue City Police Office, sa pakighinabi sa Bombo Newsteam, nga atul sa buy-bust nasikop sa City Drug Enforcement Unit ang usa ka 46-anyos nga babaye nga taga Barangay San Roque sa dakbayan sa Talisay human kini nakuhaan og 1.025 ka kilo nga shabu nga adunay gibanabanang standard drug price nga P6.9 million.
Dugang pa, nasikop usab sa Centro Police Station ang 22-anyos nga lalaki nga nailang si Yan-yan, kinsa temporaryong nagpuyo sulod sa compound sa CICC.
Matud ni Villaro nga nakuhaan kini og 400 gramos nga gituohang shabu nga adunay standard market price nga P2.7 milyones.
