Cebu City– Muabot sa 873 passengers ug 48 vessels ang stranded karon sa port sa Cebu nunot sa pagkanselar sa PCG (Philiipine Coast Guard-7)sa mga biyahe tungod sa bagyong Samuel.
Matud ni PCG (Philiipine Coast Guard-7) Commander Alvin Dagalea nga otomatiko nila nga ikanselar ang mga biyahe padulong sa mga lugar nga gipa-ubos sa tropical cyclone signal warning.
Nagpahimangno na usab si Dagalea sa mga mananagat nga dili usa mulawig ug mulikay sa pagpanagat tungod sa ngil-ad nga lakat sa panahon.
Samtang gisuspenso na usab ang klase gikan sa kindergarten hangtud sa senior highschool sa tanang pampubliko nga tunghaan sa tibuok Rehiyon 7 human nga gi-aprubahan ang resolution sa Regional Disaster Risk Reduction and Management Council isip pagpangandam sa Bagyong Samuel. Ang mga pribado nga skwelahan sa laing bahin mamahimo nga manawag sa ilang admin kung may klase ba sila o wala.
Sigon usab ni Baltazar Tribunalo Jr. ang head sa PDRRMO ( Provincial Disaster Risk Reduction and Management Office) nga andam na ang ilang team ug gipahimangnu-an na nila ang mga residente nga nagpuyo sa mga high risk area. Kung mahimo ikanselar na usab ang mga activities nga nakatakda nga ipahigayon ugmang adlawa sa mga high risk area sa probinsya sa Cebu.
Nangandam na usab ang mga residente sa coastal barangays ilabina sa Amihanang Sugbo tungod sa posibilidad sa storm surge.
