Desidedo ug seryoso si Dumanjug Mayor Gungun Gica nga pasakaan og kasong unbailable ang mga suspetsadong nalambigit sa Cyberpornography.
Kini human gipatawag ni Mayor Gica ang duha mag-live in partners human masayri nga gidakop sila sa kapulisan tungod sa seryosong reklamo nga gisang-at sa Municipal Social Welfare and Development Office (MSWDO).
Diin usa ka onse anyos nga bata ang ilang gigamit sa malaw-ay nga binuhatan ug dili lang usa ka biktima gumikan nasayran nga aduna pay laing mga menor de edad ug usa niini kay kaugalingong anak sa mga suspetsado.
Gipaambit usab sa mayor nga andam kini nga mahugawan ang iyang mga kamot aron hingpit nga malimpyo ang iyang gidumalaan kabahin sa mga kasong rape, child cyber pornography, child trafficking, ug VAWC.
Ingon man nga nihatag kini og ultimatum sa tanang nalambigit sa illegal nga kalihokan nga itugyan ang ilang kaugalingon hangtud sa Agosto 28 ug kon dili sila makasurender, ang ilang opisina na mismo ang modakop nga anaa sa ilang listahan.
Atol sa pakighinabi sa Bombo Radyo Cebu sa amahan sa 11-anyos nga biktima kay mismo siya nakurat sa gidangatan sa iyang anak ug nasakitan, apan dili na kini gustong mapadako pa ang kaso gumikan sa kawad-on sa pinansyal ug walay ikagasto.
Sa pikas bahin, imbistigahan usab sa Commission on Human Rights (CHR) 7 ang mikatap nga video ni Mayor Gica diin nakuhaan ang insidente nga giingong gi-assault niini ang mga ginikanan tungod sa kasuko.
Matud ni Atty. Arvin Odron, CHR Central Visayas director, nga ilang tukion ang nadawat nga impormasyon, apil na ang pagpadala og grupo sa mga imbestigador aron pag-verify sa panghitabo.
Dugang niini nga kon gani tinuod ang alegasyon kay masakop kini sa hurisdiksyon sa tawhanong katungod, nga maglambigit sa usa ka personalidad sa gobyerno, opisyal sa gobyerno, o state actor.
Gipahinumduman usab niya nga ang gobyerno adunay responsibilidad sa pagpanalipod sa mga katungod sa mga tawo, ug ang mga opisyal sa gobyerno kinahanglan nga kauban sa pagsiguro sa proteksyon.
