CEBU – Patay ang 8 ka mga tinun-an ug usa ka ginikanan human nga maaksidente ang gisakyan nga dump truck sa Sitio Lingatong, Barangay Upper Becerril, lungsod sa Boljoon, Cebu, kaganihang buntag.
Kini ang gikumpirmar ni Robin Nieri, ang tigpamaba ni Boljoon Mayor Merlo Derama.
Matud ni Nieri nga gikan sa Nangka Elementary School ang mga tinun-an ug paingun unta sa lungsod alang sa ilahang district meet.
Giingung nawagtangan ug preno ang truck hinungdan nga gibangga sa drayber nga si Danilo Nieri, sa wala nga bahin sa pangpang arun nga dili sila matagak sa hilabihan ka lawum nga bung-aw sa tu-u nga bahin.
Apan gumikan sa makusug nga impact, nalimbuwad ang nahisgutang dump truck ug nalagput ang mga sakay niini.
Dali man usab nga naka-responde ang disaster team sa nahisgutang lungsod ug gidala sa district hospital ang mga biktima apan gumikan sa naangkun nga mga bun-ug ug samad sa kalawasan hayan nakabsan gayud sa kinabuhi ang nahisgutang mga tinun-an.
Padayun usab nga gitambalan ug gi-obserbaran ang uban pang mga samdan sa nahitabung aksidente.
Gi-asuy ni Nieri nga ‘request’ sa Department of Education provincial district nga kuha-un ang mga nahisgutang tinun-an gikan sa ilahang tunghaan ug dalhun sa lungsod alang sa ilahang district meet.
