Nagdumili si kanhi Presidente Rodrigo Duterte sa paghatag og komento sa pagsumite ni kanhi Senador Antonio Trillanes IV sa transcript sa iyang Senate testimony sa war on drugs ngadto sa International Criminal Court (ICC).
Ang prangka nga kritiko ni Duterte nga si Trillanes nibutyag sa iyang X account nga gipadala na ngadto sa ICC ang transcript sa Senate hearing niadtong Lunes, Oktubre 28 diin miangkon si Duterte sa extrajudicial killings (EJK) sa war on drugs.
Matod ni Trillanes, ang mga transcript sa imbestigasyon sa House Quad Committee napadala na sa ICC kaniadto ug gidawat silang tanan.
Apan, gitino ni Duterte, nga wala’y nahimo si Trillanes gawas sa pagsulti mao nga dili niya tubagon ang giingon nga pagsumite sa mga transcript sa kanhi senador sa ICC.
Dugang pa, wala pa makatambong si Duterte sa imbestigasyon sa QuadComm.
Miingon siya nga gusto niya nga motambong, apan sa lain nga higayon nalang.
Giingong iyang gisulti sa iyang testimonya sa Senado ang mga pangutana kalabot sa war on drugs.
Unang mitunga si Duterte niadtong Oktubre 28 sa imbestigasyon sa Blue Ribbon Subcommittee kalabot sa war on drugs.
Nahibulong si Duterte nganong wala pa man makapasaka og kaso ang Department of Justice (DOJ) batok kaniya nga dugay na man siyang nipatay.
