CEBU CITY — Gihimug-atan sa usa ka political analyst nga nipatigbabaw ang “dynamics” sa demokrasya sa Estados Unidos, ilabi na nga gi-atangan karon sa kalibutan ang resulta sa piniliay.
Kini mismo ang reaksyon ni Dr. Clarita Carlos gikan sa University of the Philippines (UP) Diliman subay na sa nahitabong pinili-ay.
Nagpaabot karon ang mga Amerikano sa resulta eleksyon diin nag-una si Democratic Party candidate Joe Biden sa gidaghanon sa mga electoral votes.
Matud ni Carlos nga adunay nahimo si Donald Trump sulod sa upat ka tuig niining pagdumala sa Estados Unidos isip presidente.
Dugang pa niini nga aduna kini pamaagi, ingon man anaa siyay napamatud-an sa iyang mga liderato, bisan pa man ug naputos kini sa pagsaway sa publiko ug mga kritiko.
Gibarugan usab ni Carlos nga adunay dakong papel ug gahom ang “millennials” alang sa kabag-uhan sa dagan sa pulitika sa nasud.
Nanghinaut karon si Carlos nga kung makadaug si Biden sa pagka-presidente, mahatagan niini og pagtagad ang pipila ka mga isyung gi-atubang sa nasud ug kalibutan, sama lang sa West Philippine Sea nga giilogan sa Pilipinas ug China. (gbs/gn)
