CEBU CITY – Mokabat na sa dul-an P140-million ang namugnang danyos sa El Niño phenomenon sa probinsya sa Sugbo.
Kini ang gipadayag sa tigpamaba sa Cebu Provincial Disaster Risk Reduction and Management Office (PDRRMO) nga si Julius Regner.
Matud ni Regner nga nagkadugang ang danyos base sa damage report gikan sa nagkadaiyang kalungsuran sa probinsya.
Nagkanayon si Regner nga padayon ang pagtunol sa mga hinabang ngadto sa mga apektadong LGUs diin una nilang gihatagan og pagtagad ang ilang financial ug food for work assistance program alang sa mga mag-uuma ug mananagat.
Samtang gikalipay sa PDRRMO ang nasinating pag-uwan gumikan kay makatabang kini og dako alang sa mag-uuma sa kabukiran.
Bisan pa man nga walay deklarasyon ang PAGASA mahitungod sa La Niña, gipangandaman usab kini sa PDRRMO ilabi na nga padung na magsugod ang ting-uwan.
