NEGROS ISLAND- Nagpadayon ang clearing ug retrieval operations sa kasundaluhan sa Brgy. Salamanca, Toboso, Negros Occidental human sa engkwentro tali sa 79th Infantry Battalion sa Philippine Army ug mga salin sa New People’s Army (NPA).
Gipahinumdoman sa mga otoridad ang mga mibakwit nga dili sa mobalik sa ilang panimalay hangtod nga mahuman ang operasyon aron maseguro ang ilang kaluwasan.
Sa report, anaa sa 19 ka tawo ang namatay sa kampo sa NPA, lakip si Roger Fabillar alias Arnel Tapang, lider sa Northern Negros Front.
Usa usab ka sundalo ang nasamdan apan anaa na sa stable nga kondisyon sa ospital.
Kapin sa 600 ka residente ang mibakwit ug gipapuyo sa tulo ka eskwelahan nga gihimong evacuation centers.
Sa kinatibuk-an, anaa sa 168 ka panimalay o 653 ka indibidwal ang naapektuhan, lakip ang mga gikan sa silingang Brgy. San Jose.
Sumala sa mga otoridad, makabalik lamang ang mga residente kung matangtang na ang red alert status human sa clearing ug retrieval operations.
