CEBU CITY-Gipang-apod-apod na ngadto sa mga magtutudlo nga mosilbi sa adlaw sa Barangay at Sangguniang Kabataan Elections (BSKE) 2023 ang mga election paraphernalias sama sa mga non-aacountable forms ug mga ballot boxes.
Gipahigayon ang maong kalihukan kagahapong adlawa, Oktubre 28, 2023 sa Cebu City Hall grounds.
Subay niini, grabe ang nasinatian nga pagka-agrabyado sa mga magtutudlo, gani pipila kanila ang gikinahanglang magbulad sa init sulod sa pila ka oras.
Pipila sa mga nakalinyang mga magtutudlo mipadangat sa ilahang mga reklamo gumikan kay sumala pa nga gubot ang nahimong distribusyon sa mga election paraphernalias nga gidumalaan sa Cebu City Treasurer’s Office.
Adunay pipila usab nga mipadayag sa ilahang suhestyon nga ihatod na lang ang mga ballot boxes ug ubang mga gamit sa piniliay diretso sa mga presinto aron malikayan ang kagubot nga nasinatian sa mga magtutudlo.
