Niduso og “Electoral Protest” si outgoing Cebu Governor Gwendolyn Garcia sa Commission on Elections (COMELEC), kini subay sa bag-o lang nahuman nga 2025 Midterm Elections.
Nakahukom si Garcia nga mohimo og aksyon tungod kay matod niya adunay kapin sa upat ka libo ka clustered precincts, ug iyang giinsistir, uban sa nagkadaghang ebidensiya nga ang mga boto alang kaniya gibalhin ngadto sa ubang mga kandidato, particular na sa iyang kaatabang nga si Cebu Governor-elect Pamela Baricuatro.
Matud pa sa isyu, bisan pa man sa iyang kapakyas sa pagdaog pag-balik sa pagka-gobernadora sa Probinsiya sa Sugbo sa ikaduhang higayon, kay wala gibasol ni Garcia ang mga mayor sa iyang kapildihan.
Kusganong gituohan hinuon niini nga adunay nagmaniobra sa iyang kapildihan hinungdan nga misangpot kini sa pagsang-at og Electoral Protest sa COMELEC.
Subay niini nanghinaot kini nga ang COMELEC mohimo og aksyon kalabot sa iyang gisang-at nga “Electoral Protest.”
Dugang pasingit pa niini nga daw posibleng nakadaog si Baricuatro tungod kay maayo kini mosayaw sa tiktok ug himsog ang mga paa.
Samtang, sa habig sa Commission on Elections – Central Visayas nga dili na sila manghilabot sa giduso ni Governor Garcia.
Mao kini ang giklaro ni Atty. Francisco Pobe, ang regional director COMELEC 7 diin ang kaulohan na ang modesisyon kung tugutan ba niini ang ‘Electoral Protest’ ni Garcia.
Dugang pa ni Pobe nga humana sila sa ilang tahas diin giproklamar na nila si Baricuatro isip bag-ong gobernadora sa probinsya sa Sugbo.
Miluwat usab og pamahayag si Atty. Edmund Lao, ang pangu sa transition team ni Baricuatro nga wala pa sila
makadawat og kopya sa electoral protest ni Gwen Garcia.
Ug kon gani ma-secure na nila ang dokumento, maghatag sila og komentaryo bahin niini. | Bombo Irene Ardiente
