PROVINCE OF CEBU-Gibanabana nga nubenta na lang ka adlaw ang PowerSource Philippines Inc. (PSPI) nga himuon ang tanang gikinahanglang pagpangandam sa dili pa sila hingpit nga mohunong sa ilang operasyon isip nag-inusarang power provider sa Malapascua Island sa Daanbantayan ug sa dili pa kini i-turn over sa Cebu Electric Cooperative, Inc 2.
Kini nunot sa kapakyas pagsulbad sa kakuwang sa suplay sa kuryente sa nahisgutang Isla.
Nasayran nga sa dihang gi-terminate sa CEBECO II ang kontrata niini sa PSPI, automatic usab nga na-terminate ang kontrata sa National Power Corporation.
Niadtong Hunyo 3, 2024, nagtigom sila Cebu Provincial Governor Gwendolyn Garcia, Daanbantayan Mayor Sun Shimura, National Electrification Administration ENGINEERING DEPARTMENT director Federico Villar ug daghan pa aron sa pagsulbad sa isyu sa kuryente sa isla.
Ang General Manager sa CEBECO II niingon nga ang mga sakop sa board nipirma na sa pag-undang sa waiver nga gipirmahan niadtong 2009, nga naghatag og panahon sa PSPI sa pagsuplay sa Malapascua nga maoy nagkupot sa ikaupat nga distrito sa Sugbo.
Ug tungod sa termination, ibalik sa CEBECO II ang operasyon ug kontrata sa Isla.
Kung nahinumduman nga nipalit og upat ka generator set ang Cebu Provincial Gov’t aron masulbad ang problema ug mahatagan og kahupayan ang mga residente ug turista sa pagkapalong sa kuryente.
Ug tungod sa brownout, niingon ang gobernador nga gipamub-an sa mga turista ang ilang pagpuyo kay hasol kaayo.
Ang mga generator set gipanag-iya sa usa ka pribadong kompanya ug makahatag sa isla og 2 megawatts nga kuryente.
Sa pagkakaron, misaad ang kapitolyo nga makig-alayon sila sa CEBECO II aron mabalik ang suplay sa kuryente sa Isla.
