Masaligon ang Department of Justice nga mahuman ang Environmental case nga giandam niini batok sa China.
Kini mao’y gipahibalo ni Justice Spokesperson Atty. Mico Clavano nga may kalabutan sa pagkaguba sa mga reef sa pipila ka bahin sa West Philippine Sea.
Matod niya, sulod sa pipila ka semana ilang gipaabot nga maandam na ang ilang giandam nga reklamo batok sa China diin magbutang sila og mga attachment sa mga ebidensya nga ilang gihuptan bahin niini.
Subay niini, gipahibalo usab ni Clavano nga nagplano sila nga mangayo og tabang sa Office of the Solicitor General alang sa pagpasaka og Environmental case batok sa China.
Kung nahinumduman, si Justice Sec. Jesus Crispin Remulla nga ang ilang pagpasaka sa kaso batok sa nasangpit nga nasud nunot sa kompirmadong taho sa AFP Western Command nga ang China nagpahigayon og massive coral harvesting sa Iroquois Reef sa West Philippine Sea.
Kahinumdoman usab nga bag-o lang giingon sa Philippine Coast Guard nga gihuman sa China ang pagdugmok sa mga corals sa may Escoda Shoal isip pagpangandam sa ilang reclamation activities sa maong lugar isip kabahin sa giingong pagtukod nila og Artificial island, butang nga hugot nga gikondenar sa labaw nga mga opisyal sa gobyerno.
