MANDAUE CITY – Giklaro ni Barangay Jagobiao Mandaue Kapitan Michael Macenas nga wala gihimong ‘quarantine area’ ang Eversley Child Sanitarium nga nahimutang sa nahisgutang barangay.
Kini ang pamahayag ni Kapitan Macenas human nga nakamugna ug kabalaka sa mga residente niini subay sa report nga adunay mga pasahero nga gikan sa Hong Kong ang giingong gipaubos sa quarantine sa nahisgutang tambalanan.
Matud sa opisyal nga gumikan sa maong report, dali niini nga gibisita ang tambalanan ug gisubay kung tinuod kini sanglit wala man kini mag-agi kaniya.
Hinuon, giangkon ni Macenas nga hurisdiksyon na kini sa Department of Health (DOH) ug mipasalig ang maong ahensya kaniya nga adunay mga safety measures nga gipahigayon.
Giingong giklaro sa ahensya nga bugtong ‘screening’ lang ang gipahigayon sa nahisgutang tambalanan, butang nga dili angayang kabalak-an.
Bisan pa man niini, dili siyento porsyento nga nawakli ang kabalaka sa mga residente ug padayon ang ilahang mga pangutana ug nganong sa Eversly ipahigayon ang ‘screening’.
Kung ugaling adunay magpositibo sa N-CoV, giklaro nga adto kini i-refer sa Vicente Sotto Memorial Medical Center ug ipaubos ug quarantine sa Pinamungajan. | FDP/SBR
