Gibutyag sa 18 ka nagpailang kanhing Marines nga sila matod pa ang naghatod sa mga maleta nga puno sa kwarta ngadto sa pipila ka prominenteng opisyal sa gobyerno lakip na sila Pangulong Ferdinand Marcos Jr., Senador Vicente Sotto III, Sen. Erwin Tulfo, ug Mamamayang Liberal Party-list Representative Leila de Lima, kanhi ACT Teachers Party-list Rep. France Castro ug uban pa.
Basi sa joint affidavit sa 18 ka kanhing sundalo nga napailang mga “bagman” ni kanhi Ako Bicol Party-list Rep. Zaldy Co, sila ang nagdeliver sa bilyon-bilyong pisong kickback gikan sa mga flood control projects nga gisulod sa mga maleta, diin matag maleta adunay sulod nga mokabat sa P48 milyones.
Atol sa Senate hearing kabahin sa kontrobersiya sa flood control projects, gibutyag sa usa sa ex-Marines nga si Johnny Buduan nga niadtong 2022, nakahatod sila og lima ka maleta sa Ilocos Norte nga giingong alang kang Pangulong Ferdinand Marcos Jr.
Matud sa testigo, adunay usab mga maleta nga ilang gidala atol sa campaign period niadtong 2022 nga gidawat ni Rep. Sandro Marcos samtang si Zaldy Co maoy nagkuha og litrato.
Gipasiugda usab sa mga testigo nga nakahatod sila kang Sen. Vicente Sotto og milyon-milyong piso o lima ka dagkong maleta nga puno sa kwarta sulod sa usa ka building sa Baclaran, Parañaque niadtong 2024 sa wala pa ang election campaign period.
Gikompirmar usab sa testigong si Bernard Gumban nga duha ka higayon siyang nakadeliver sa balay ni Senador Erwin Tulfo. Ang una kay gagmay ug medium-sized nga mga maleta nga gibanabanang adunay sulod nga P20 milyon hangtod P50 milyon, samtang sa ikaduhang higayon kay unom ka maleta nga lain-laig gidak-on.
Lakip usab sa opisyal nga listahan sa mga giingong gidul-an o pirming ka-meeting ni Zaldy Co basi sa gibutyag sa hearing sila Rep. France Castro, kanhing Rep. Leila de Lima ug kanhing Rep. Raoul Manuel.
Apil usab sa lista si kanhing Sen. Antonio Trillanes IV nga giingong gihatagan og kwarta alang sa paggasto sa imbestigasyon sa ICC ug ang pari nga si Fr. Flavie Villanueva.
Lakip pa sa mga magbabalaod nga giingong gipadalhan og mga maleta nga puno sa kwarta sila Rep. Terry Ridon, Rep. Gerville Luistro, kanhing Rep. Arlene Brosas, Rep. Benny Abante, Rep. Zia Adiong, Rep. Jose Alvarez, kanhing Rep. Ace Barbers, Rep. Joel Chua, kanhing Rep. Dan Fernandez, Rep. Janette Garin ug kanhing Rep. Stella Quimbo.
