CEBU CITY – Nabalhog sa prisuhan ang usa ka kanhi-police officer human nga nakuhaan og ginadiling drugas sa usa ka checkpoint area sa Brgy. Umapad, Mandaue City.
Giila ang dinakpan nga si Rodrigo Morados, 38 anyos, ug lumad nga taga-Bung-aw, Negros Oriental.
Matud ni Police Master Sgt. Rey Patigdad sa Mandaue City Police Station 5, nga nagsakay ang kanhi pulis sa taxi ug mihunong kini sa checkpoint area sa Plaridel Street.
Nabantayan sa mga pulis nga gi-aksyon og labay ni Morados ang 1 ka pakete nga shabu hinungdan nga nasikop kini dayon.
Gawas sa usa ka pakete nga shabu, nakuhaan usab siya og mga drug paraphernalia sama sa lighter, aluminum foil, ug uban pa.
Nasayran nga na-assign si Morados kaniadto sa Sibulan, Negros Oriental isip kanhi Police Officer 3 ug na-dismiss kini sa serbisyo niadtong 2015.
Palawmon usab sa kapulisan ang imbestigasyon kung nganong nataktak si Morados sa pagka-police officer.
Anaa sa Mandaue City Police Office Headquarters si Morados ug kasuhan siya og kalapasan sa Section 11 ug 12 sa Republic Act 9165 kon Comprehensive Dangerous Drugs Act of 2002.
