IBALIK ni Mayor Edgardo Labella ang decongestion program sa Cebu City Jail Female Dormitory aron maluag-luag na ang nahimutangan sa mga babayeng piniriso.
Kini pinaagi sa “speedy trial” sa kaso sa mga inmates ug sa pagpahimulos sa plea bargaining agreement aron makagawas ang mga piniriso.
Matud ni Labella nga iyang banhawon ang paralegal services nga maoy motabang sa pag-atiman sa mga kaso aron nga madali ang pagsulbad niini.
Nasayran nga anaa sa halos 1,000% ang congestion rate sa mga babayeng inmates sa Female Dormitory ug 82 lang ang ideal capacity niini.
Matud ni Jail Chief Inspector Irene Alcomendras, ang jail warden sa Female Dormitory, nga anaa sa 966 ang mga nabalhog sa maong prisuhan diin sagad kanila, nag-atubang og kasong may kalabot na sa ilegal nga drugas.
Dugang pa ni Alcomendras nga usa sa mga factors sa ilang sitwasyon mao ang kahinay sa dagan sa kaso gumikan lang sa kagamay sa mga huwes.
Misaad si Labella sa warden nga iyang atimanon ang mga panginahanglanon sa mga inmates alang sa ilang kahapsay.
Ipadangat usab sa pamunuan sa Cebu City Jail Female Dormitory ang ilang mga panginahanglanon sama lang sa higdaanan, ug uban pa.
