METRO MANILA-Mitanyag ang United States, Australia, Chinese, ug Canadian Embassies sa Manila og tabang samtang mikuso-kuso ang Super Typhoon Carina sa pipila ka bahin sa Pilipinas, ilabi na ang Metro Manila.
Sa giluwat nga pamahayag ni US Ambassador MaryKay Carlson nga ang koordinasyon tali sa embahada ug sa gobyerno sa Pilipinas kay nagpadayon.
Matud pa niini nga andam ang Estados Unidos nga motabang sa bisan unsnag pamaagi alang sa pagtabang sa mga apektadong komunidad.
Ingon man nga mipadayag si Australian Ambassador HK Yu nga andam usab ang Canberra sa pagtubag kung adunay hangyoon ang Pilipinas.
Sa managlahing mga post, si Chinese Ambassador Huang Xilian ug Canadian Ambassador David Hartman nagpahayag usab sa kaandam sa paghatag og tabang.
Samtang ang gipaabot nga mensahe nila ni Japanese Ambassador Kazuya Endo ug European Union Ambassador Luc Veron, ngadto sa mga pamilyang nawad-an og pamilya nga magpabilin nga lig-on.
Subay niini, mokabat sa 183,464 ka pamilya o 882,861 ka mga tawo ang naapektuhan sa pagbunok sa ulan ug pagbaha sa Ilocos Region, Central Luzon, Calabarzon, Mimaropa, Central Visayas, Zamboanga Peninsula, Northern Mindanao, Davao, Soccsksargen, Caraga, ug Bangsamoro Region.
Sa pagkakaron, walo ka patay, duha ang naangol ug usa ka missing ang gitaho sa National Disaster Risk Reduction and Management Council.
