Dili motambong si kanhi President Rodrigo Duterte sa unang status conference sa iyang kaso sa International Criminal Court (ICC) nga gikatakda sa Mayo 27, 2026.
Kini human opisyal nga gisumite sa iyang legal team ang “Defense Notification of Mr Duterte’s Signed Waiver to Appear at the First Status Conference” ngadto sa ICC Trial Chamber III niadtong Mayo 25.
Base sa dokumento nga gisumite sa lead counsel nga si Atty. Peter Haynes, KC, giingong gitugutan ni Duterte ang iyang mga abogado nga morepresentar ug modumala sa tanang mga butang nga may kalabutan sa hearing.
Sumala sa depensa, hingpit nga nagsalig ang kanhi presidente sa iyang legal team nga sulbaron ang mga isyu nga hisgutan sa status conference, lakip na ang ubang mga isyu nga mahimong ipataas atol sa hearing.
Ang pagsumite sa waiver nahiuyon sa direktiba sa ICC Trial Chamber niadtong Mayo 22 nga nagtugot sa depensa sa pagsumite og pormal nga sinulat nga waiver sa dili pa ang Mayo 25.
Kung diin, ang kaso ubos sa case number ICC-01/21-01/25 nga may kalabutan sa imbestigasyon sa ICC sa sitwasyon sa Pilipinas.
Ang status conference pagapangulohan ni Judge Joanna Korner uban nila ni Judge Keebong Paek ug Judge Nicolas Guillou.
Wala nay dugang nga pahayag gikan ni Duterte bahin sa iyang pag-absent sa hearing.
