Nagsang-at og petisyon ang kampo ni kanhi President Rodrigo Duterte sa International Criminal Court (ICC) aron supakon ang hangyo sa prosekusyon nga susihon ang mga butang nga nasakmit atol sa iyang pag-aresto, nga ilang gihulagway isip usa ka “fishing expedition” o pagpangita og ebidensya nga walay igo nga basehan.
Matud ni lead defense counsel Atty. Peter Haynes, dugay nang anaa sa kustodiya sa ICC Registry ang maong mga butang, apan karon pa lamang kini gustong susihon sa prosekusyon bisan pa nga nakumpirma na ang mga kaso batok kang Duterte.
Giingon niya nga mahimo lamang kini’g hinungdan sa dugang nga paglangan sa proseso sa husay.
Gisaway usab sa depensa ang hangyo sa prosekusyon nga susihon ang tanang yawe nga nasakmit, nga nag-ingon nga wala kini’y klarong kalabotan sa kaso ug posibleng makalapas sa pribasiya sa mga paryente ni Duterte.
Tungod niini, gihangyo sa kampo ni Duterte ang ICC Trial Chamber III nga magtakda og Hunyo 30, 2026 isip deadline sa bisan unsang bag-ong mosyon sa prosekusyon may kalabotan sa mga ebidensya nga anaa sa ICC Registry.
Tumong sa depensa nga malikayan ang dugang nga paglangan sa pagpangandam alang sa umaabot nga husay.
