Magpabilin nga nakadetine si kanhi President Rodrigo Duterte sa The Hague samtang naghulat sa pagsugod sa iyang husay sa kasong crimes against humanity, sumala sa International Criminal Court (ICC).
Sumala sa desisyon sa ICC Trial Chamber III, ang mga argumento sa depensa bahin sa kahimsog ni Duterte dili igo aron mapulihan ang nangaging findings sa court-appointed medical experts.
Gipasiugda sa korte nga walay bag-ong ebidensya o hinungdanon nga pagbag-o sa kahimtang sa kahimsog sa kanhi presidente nga maghatag ug katarungan sa iyang temporaryong pagpagawas.
Gikonsiderar usab sa ICC ang iyang pagdumili sa pag-ila sa hurisdiksyon sa korte, nga giingon niini nga nagpakita nga mahimo siyang dili motuman sa bisan unsang mando sa korte kon buhian.
Gidugang sa ICC nga adunay “real and substantial risk” nga mahimo siyang moikyas o makababag sa proseso sa hustisya tungod sa iyang impluwensya ug mga koneksyon.
Niining bahina, gihatagan sa korte ang depensa og permiso alang kang Duterte nga dili motambong sa unang status conference nga gikatakda sa Mayo 27, basta mosumite siya og pormal nga hangyo.
Maghisgot ang hearing sa iskedyul sa husay, ebidensya, ug uban pang mga pagpangandam alang sa kaso.
Gikumpirma na sa ICC Pre-Trial Chamber I ang mga kaso batok kang Duterte kalabot sa giingong pagpatay atol sa iyang kampanya batok sa droga sa dihang siya pa ang mayor sa Davao City ug sa ulahi presidente sa Pilipinas.
