Gipangulohan ni Presidente Ferdinand R. Marcos Jr. ang pagpanumpa sa kanhi Kalihim sa Turismo nga si Christina Garcia Frasco isip Presidential Adviser para sa Sustainable and Resilient Communities (SRC).
Pipila ka mga litrato ang gipagawas sa Presidential Communications Office diin nagpakita kang Marcos ug Frasco nga naglamano atol sa seremonya nga gihimo sa Malacañang Palace sa Manila.
Isip bag-ong adviser ni Marcos, si Frasco ang gitahasan sa pagpadali sa paghiusa ug pag-align sa mga inisyatibo, plano, palisiya, ug programa sa nasudnong gobyerno nga nagtumong sa pagpalambo sa malungtarong ug lig-on nga mga komunidad.
Kini nga mga inisyatibo naglakip sa mga interbensyon nga may kalabotan sa pagkunhod sa peligro sa katalagman, pagpahiangay sa klima, pagdumala sa kalikopan, ug malungtarong lokal nga kalamboan.
Ang bag-ong tahas ni Frasco makapahimo usab kaniya sa pag-coordinate sa mga ahensya sa nasudnong gobyerno, mga local government units, ug mga may kalabotan nga stakeholder aron suportahan ang epektibo nga pagpatuman sa mga direktiba sa presidente ug prayoridad sa mga nasudnong inisyatibo nga may kalabotan sa malungtaron ug lig-on nga mga komunidad.
Gimandoan usab siya sa pag-ila sa mga kakulangan ug mga babag sa mga paningkamot aron makab-ot ang mga katuyoan sa gobyerno.
Gipangulohan ni Frasco ang Department of Tourism gikan sa 2022 hangtod nga iyang gisugdan ang iyang bag-ong tahas.
Niadtong Martes, ang Malacañang miingon nga si Marcos nagpadayon sa pagsalig kang Frasco, ug gipasiugda nga ang Chief Executive nagpabilin nga masaligon sa iyang abilidad sa pagtuman sa iyang bag-ong mga responsibilidad.
