CEBU CITY — Gihatagan ug katin-awan ni Cebu City Councilor Joel Garganera nga walay mahitabong lockdown ang entero dakbayan.
Giklaro ni Garganera nga wala kini namahayag nga mag-lockdown ang dakbayan, inay giingong aduna lang posibilidad kung magpadayon ang pagsaka sa kaso sa coronavirus.
Matud pa sa konsehal nga niadtong bulan sa Oktubre nagsugod na ug ‘single digit’ ang kaso sa COVID sa dakbayan apan kalit na lang usab nga mibalik ug ‘double digit’, butang nga gikabalak-an na usab.
Giingong kung magpadayon nga magpabadlong ang mga tawo, ug magkumpyansa lang, hayan posibli gayud nga ibalik sa lockdown ang dakbayan.
Gitataw ni Garganera nga sila usab mismo sa Cebu City Emergency Operations Center (EOC), ingon man si Cebu City Mayor Edgardo Labella, ang dili na gusto nga mahitabo pagbalik ang lockdown gumikan kay giingong gikapoy na usab sila ug hilabihan na ka ‘drain’ ang lokal nga pangagamhanan.
Gidugang pa niini nga gusto ang tanan nga magselebrar ug Pasko hayan hangyo sa konsehal nga likayan una pag-abusar sa mas lu-ag nga community quarantine ug padayon nga sundon ang mga giladlad nga health protocols. (sbr/gn)
