Gidakop sa kapulisan si Antonio Meloto sa Angat, Bulacan kalabot sa kasong qualified trafficking in persons nga iyang giatubang.
Gikumpirma sa Police Regional Office 3 (PRO-3) nga ang pagdakop gibase sa usa ka warrant of arrest nga gi-isyu batok kang Meloto alang sa duha ka ihap sa qualified trafficking in persons, nga giisip nga non-bailable offense.
Sumala ni Police Brigadier General Jess Mendez, regional director sa PRO-3, gihimo ang pagdakop niadtong Biyernes sa Angat, Bulacan.
Kahinumduman nga niadtong Septyembre, ang Department of Justice (DOJ) nakakita og probable cause aron magpasaka og kaso batok kang Meloto kalabot sa giingong sexual abuse sa duha ka lalaking benepisyaryo sa Gawad Kalinga niadtong 2017.
Base sa resolusyon sa DOJ, ang giingong mga binuhatan ni Meloto mahimong ikonsiderar nga sex trafficking nga adunay abuse of authority.
Giingon usab sa mga prosecutor nga ang mga alegasyon batok kang Meloto dili lamang simpleng misconduct, kondili kabahin sa usa ka giingong sistematikong pag-abuso nga gihimo pinaagi sa paggamit sa iyang impluwensya ug posisyon sulod sa organisasyon.
Sumala sa mga nagreklamo, ang giingong pag-abuso nahitabo sa dihang sila mga iskolar pa sa Gawad Kalinga sa GK Enchanted Farm sa Angat, Bulacan niadtong 2017.
Mibiya si Meloto sa Gawad Kalinga sa maong tuig human sa internal nga imbestigasyon nga gihimo sa board sa organisasyon.
