LAPU-LAPU CITY-Nabalhog sa prisohan ang usa ka German national human kini madakpi sa Mactan Cebu International Airport (MCIA) niadtong Miyerkules, Mayo 22, tungod sa giingong kalambigitan niini sa large scale illegal recruitment.
Giila ang dinakpan nga si Ramon Hansmeyer, usa ka German national.
Gibutyag ni NBI Cebu District Office (Cebdo) Agent-in-Charge, Arnel Pura, nga ang pagkasikop naggumikan sa usa ka request for investigation sa deferred departure incident nga naglambigit sa suspek ug upat ka mga Filipino.
Dugang pa nga si Hansmeyer, tag-iya sa German language school, giingong nagtanyag sa mga biktima og vocational courses sa Germany diin mobayad sila og EUR11,000.
Sa ilang pagpaingon sa Germany, ang mga indibiduwal gi-turnover sa mga opisyal sa imigrasyon aron matino kon sila ba mga biktima sa human trafficking ug/o illegal recruitment.
Ang imbestigasyon nisangpot sa pagkasikop ni Hansmeyer kinsa anaa na karon sa kustodiya sa NBI CEBDO.
