CEBU – Nasikop sa mga sakop sa National Bureau of Investigation (NBI) 7 ang usa ka 26-anyos nga babaye pinaagi sa usa ka entrapment operation.
Giila ang dinakpan nga si Lordelyn Viloria Caballero, ug residente sa Villa Bulsita, Barangay Bulacao, dakbayan sa Sugbo.
Gibutyag ni Atty. Wenceslao Galendez, Jr., supervising agent sa NBI 7, nga nasayran nila ang kalihokan sa suspek human nga pipila ka mga indibidwal nga nagkuha ug NBI clearance ang namatikdan nga peke ang mga government IDs nga ipakita.
Nakuha gikan sa suspek ang kapin 50 ka mga peke nga BIR TIN cards, 9 ka mga PhilHealth IDs ug usa ka cellular phones.
Subay niini, miawhag si Atty. Galendez sa publiko nga dili magkuha ug government IDs pinaagi sa online gumikan kay sagad niini kay mga peke, hinungdan nga mas maayo nga mudiretso gayud sa mga opisina sa hingtungdang ahensya sa gobyerno.
Pasakaan ug kasong kalapasan sa Tax Code, ingon man sa Cybercrime Act, ang dinakpan.
