Nagsang-at og balaodnon si Senador Erwin Tulfo nga maghatag og walay interes nga mga pautang sa mga Overseas Filipino Workers (OFWs) aron matubag ang ilang pre-depature requirements ug mapugngan sila nga malubong sa utang sa dili pa sila mobiya sa nasud.
Ubos sa Senate Bill No. 1696 o ang “OFW Pre-Employment Loan Assistance Act,” ang usa ka OFW nga adunay balido nga kontrata sa trabaho mahimong mangutang hangtod sa P100,000. Gi-prioritize sa programa ang mga first-time OFWs, nga gikinahanglan nga moagi sa usa ka libreng financial literacy seminar sa dili pa mobiya sa nasud.
Sumala ni Tulfo, ang mga Pilipinong trabahante sa gawas sa nasud nakatampo og binilyon nga dolyar sa ekonomiya, apan daghan gihapon ang napugos sa pagpangutang sa taas nga interest rates aron mabayran ang mga placement fees, medical examinations, training, passports, visa, airfares ug uban pang mga galastuhan.
Matod niya nga daghan ang moduol sa ilang Action Center aron mangita og paagi aron mabayran ang mga kinahanglanon ug kadaghanan kanila modangop sa mga loan shark aron lang magtrabaho sa gawas sa nasud.
Kabahin niini, ang sugyot naglakip nga ang pautang walay interes sulod sa unang tuig sa pagbayad. Aron masiguro ang pagkolekta, ang usa ka miyembro sa pamilya kinahanglan nga magsilbing co-borrower. Samtang alang sa mga bag-ong OFW, ang utang mahimong mabayran sulod sa 18 ka buwan ug sila hatagan og prayoridad sa pag-access sa utang, dugang sa libreng financial literacy training.
Samtang, kung mapatuman na, ang programa ipatuman sa Department of Migrant Workers (DMW) ug Overseas Workers Welfare Administration (OWWA).
