CEBU – Gipusil dayung gibitay ang usa ka lalaki ilawum sa tulay sa Sitio Isla Berde, Barangay San Isidro, dakbayan sa Talisay kaganihang buntag.
Giila ang biktima nga si Renante Autero, gibana-banang anaa sa 40 anyus, adunay upat ka anak, ug residente sa Sitio Isla Pula, Barangay San Isidro, sa nahisgutang dakbayan.
Makita nga gitabunan ang nawung sa biktima ug gibutang nga karatula nga nag-ingun, “Ayaw kog sunda. Tulisan ko.”
Basi sa inisyal nga imbestigasyon, gipadayag ni Talisay City Deputy Chief Police Captain Nazareno Emia nga notado nga tulisan ug giingung naggawas-sulud na kini sa prisuhan.
Matud pa nga giingung nalambigit usab kini sa iligal nga drugas.
Sa pagkakarun, gilantaw sa kapulisan nga miyembro kini sa grupo sa mga holdaper nga mamiktima ug mga pasahero sa jeep ug traysikol sa lugar.
