Gi-raid sa mga sakop sa National Bureau of Investigation Central Visayas (NBI-7) ug Presidential Anti-Organized Crime Commission (PAOCC) ang usa ka hotel sa Barangay Agus, dakbayan sa Lapu-Lapu, kagahapon adlaw sa Sabado, Agosto 31, 2024 tungod sa giingong operasyon kini sa illegal nga Philippine Offshore Gaming Operator (POGO).
Uban sa maong operasyon ang mga personahe sa Department of Social Welfare and Development (DSWD) , Inter-Agency Council Against Trafficking (IACAT), Philippine Center on Transnational Crime (PCTC), Armed Forces of the Philippines (AFP), ug Bureau of Immigration (BI).
Matod pa ni Atty. Renan Oliva, ang Regional Director sa NBI-7 nga naluwas nila ang mga Indonesian, Chinese ug Burmese nationals sa maong establisemento nga giilang Tourist Garden Hotel sa naasoy nga lugar.
Matod ni Oliva nga gihangyo sila sa korte sa Mandaue City nga i-rescue ang 40 ngadto sa 60 ka mga langyaw nga giingong natanggong didto.
Apan si Oliva niingon nga nakakita sila og mga computer sa maong establisemento nga gituohang gigamit sa ilegal nga kalihokan.
Sa laing bahin, si Lapu-Lapu City Mayor Junard “Ahong” Chan padayong nakigkomunikar sa NBI-7 aron makakuha og updates sa operasyon.
Gitataw ni Chan nga kon mapamatud-an nga adunay ilegal nga operasyon sa Pogo nga nahitabo sa dakbayan, mohimo siya og aksyon aron mapasira ang maong establisemento.
