Gipasalig ni President Ferdinand “Bongbong” Marcos Jr. ang lig-on ug walay pagduhaduha nga suporta sa iyang administrasyon alang sa mga atletang Pilipino, isip pag-ila sa ilang dakong kontribusyon sa pagdala og dungog ug garbo sa nasud pinaagi sa ilang talagsaong pasundayag sa nagkalain-laing internasyonal ug lokal nga kompetisyon.
Sumala sa Pangulo, dili lamang kalingawan ang gihatag sa mga atleta ngadto sa katawhang Pilipino, kondili nagsilbi usab ang mga niini nga tinubdan sa inspirasyon ug nagdasig sa kabatan-onan ug sa ubang mga Pilipino sa pag-apil, pagkat-on, ug pagpalambo sa ilang kahanas sa nagkalain-laing matang sa paugnat sa kusog.
Busa, gipasalig niini nga magpadayon ang gobyerno sa paghatag og mas lig-on nga suporta pinaagi sa mga programa, pasilidad, ug oportunidad nga makatabang sa pagpalambo sa kahimtang sa mga atleta.
Kini aron mas mapalig-on pa ang ilang kahigayonan nga makadala og dugang nga kadaugan ug dungog alang sa Pilipinas sa umaabot nga mga kompetisyon.
