CENTRAL VISAYAS- Gitudlo ni Presidente Ferdinand Marcos Jr. si Cebu Governor Pamela Baricuatro, isip bag-ong Chairman sa Regional Development Council (RDC) sa Central Visayas sulod sa tulo ka tuig nga termino.
Nahitabo ang iyang pagtudlo duha ka bulan human niya gibawi ang iyang nominasyon aron i-endorso si Mayor Nestor Archival sa Dakbayan sa Sugbo alang sa kahiusahan.
Matud ni Baricuatro, nga wala siya katou nga itudlo siya isip pangulo sa Regional Development Council, gumikan kay iya nang gibuhian ang nominasyon niini sa nakalabayng panagtagbo sa RDC-7.
Dugang pa sa Gobernadora, nga hatagan niini ug pagbili ang pagtudlo ni Presidente Ferdinand “Bong-Bong” Marcos Jr. ug buhaton niini ang tanan kutob sa iyang makaya aron sa paghatag og pagbili sa pagsalig niini.
Kahinumdoman niadtong August 28, 2025 gibawi ni Baricuatro ang iyang nominasyon aron ituboy si Cebu City Mayor Nestor Archival, nga mahimong RDC-7, samtang kaatbang niini sa nominasyon si Bohol Governor Enrico Aristotle Aumentado.
Magsilbi si Baricuatro, sa sulod sa tulo ka tuig isip RDC-7 Chairperson, dungan sa iyang paglingkod isip gobernador sa Probinsiya sa Sugbo. Ang konseho maoy responsable sa pag-coordinate ug pagtakda sa direksyon sa mga paningkamot sa ekonomiya ug sosyal nga kalamboan sa tibuok Central Visayas.
