PROVINCE OF CEBU- Giklaro ni Governor Pamela Baricuatro nga ang probinsyal nga kagamhanan wala nakigkompetensya sa mga lokal nga panggamhanan (LGUs) sa ilang kalihokan sa relief ug rehabilitation human sa 6.9 magnitude nga linog nga miigo sa amihanan nga bahin sa Sugbo, niadtong Setyembre 30, 2025.
Gipasabot sa Gobernadora nga ang tinuod nga prioridad mao ang pag-alagad sa katawhan uban ang kalooy, panaghiusa, ug determinasyon.
Giawhag niya ang publiko nga likayan ang pamolitika ug panagbingkil, ug inay magtinabangay sa mga paningkamot sa pagbangon sa komunidad ilabi na sa mga nawagtangan og balay, panginabuhian, ug paglaum.
Gipahimangnoan usab sa probinsya nga andam silang mamati sa mga komentaryo ug sugyot, apan gipangayo nga ipadayag kini sa husto ug responsable nga paagi.
Ang pamahayag mitumaw, human sa pagsaka sa mga pagsaway sa hinay nga tubag sa gobyerno, hapit usa ka semana human sa linog nga nakapatay og 70 katawo ug nakaangol og kapin 600 pa.
Kapin 370,000 ka residente ang apektado, uban sa daghang nagpabilin sa mga tolda samtang nagpadayon ang aftershocks.
Nasuta nga hinay ang pag-apod-apod sa ayuda sa unang mga adlaw, ilabi na sa mga hilit nga lugar, samtang nagkagrabe ang trapik sa amihanang ruta.
Samtang, lima ka aksidente usab ang natala nga naglambigit sa mga sakyanan nga nagdala og relief goods, nga nakaangol sa walo ka tawo, lakip ang mga bata.
Sa kataposan, gipasidunggan sa gobernador ang LGUs, mga ahensya sa gobyerno, ug mga boluntaryo nga walay pagpanuko sa ilang serbisyo sa katawhan.
