Nangayo og dispensa si Cebu Governor Pamela Baricuatro sa mga biktima sa linog nga miigo sa Probinsya sa Sugbo niadtong Sityembre 30, tungod sa giingong pagkalangan sa pagpang apod-apod sa mga hinabang niini.
Matod niya, nasayud na ang kadaghanan nga basta maghisgut na og mga hinabang madugay gayud ang pagpagawas niini tungod kay adunay daghang proseso ang gobyerno ug nag-agi usab kini sa Provincial Board.
Dugang pamahayag ni Baricuatro, dako kaayo niyang kalipay nga nadayon na ang pagpang-hatag og ayuda sa mga biktima sa kalamidad tungod kay dugay-dugay na usab niya kining sigehan og follow-up.
Nagkanayon usab si Baricuatro nga nasayud siya nga dili lalim ang kahimtang sa kasamtangan, hinungdan nga matod niya, nagpalayo usa siya sa pamolitika.
Dugang pagtataw niya, naglikay siya sa politika tungod kay dili siya gusto nga masagolan og pamulitika iyang trabaho.
Giklaro usab ni Baricuatro nga mas buot niya nga “colorless” iyang administrasyon.
Ang kagamhanan sa Probinsya sa Sugbo nag-apod-apod og P10,000 nga tabang pinansyal ngadto sa 1,394 ka mga residente gikan sa Lungsod sa Medellin ug Daanbantayan gahapong adlawa, Mayo 20, sa Medellin Sports Complex.
Sa kinatibuk-ang mga benepisyaryo, 1,092 ang gikan sa Medellin samtang 302 ang gikan sa Lungsod sa Daanbantayan.
Ang mga nakadawat mao ang mga nabiktima sa magnitude 6.9 nga linog nga miigo sa Amihanang Cebu niadtong September 2025, diin gawas sa tabang pinansyal, ang matag benepisyaryo nakadawat usab og 10 ka kilong bugas gikan sa nasudnong gobyerno.
