Giawhag ni Cebu Governor Pam Baricuatro ang tanang Sugbuanon nga magpabiling mabinantayon ug tumanon ang mga advisory nga ipagawas sa mga Mayor ug sa Local Disaster Risk Reduction and Management Office (DRRMO). Sigun sa Gobernadora, ang mga lokal nga opisyal ang mas nakahibalo sa tinuod nga sitwasyon sa ilang tagsa-tagsa ka dapit ug sila ang makahatag og tukmang giya alang sa kaluwasan sa publiko taliwala sa bisan unsang hulga.
Nanawagan ang Gobernadora sa mga lumulupyo nga kanunay maminaw ug mosubay sa mga opisyal nga channels alang sa mga update bahin sa panahon, kahimtang sa mga dalan, ug uban pang instruksyon alang sa seguridad. Importante ang dinalian nga pagtuman sa mga kamanduan gikan sa lokal nga kagamhanan aron malikayan ang bisan unsang disgrasya o peligro sa kinabuhi ug kabtangan.
Gihatagan usab og gibug-aton sa maong advisory nga ang mga Mayor adunay katungod sa pagdeklarar og suspensyon sa trabaho kon makita nila nga gikinahanglan kini alang sa kaluwasan sa tanan. Gihangyo ang mga Sugbuanon nga magtinabangay ug magpabiling lig-on pinaagi sa pagsalig ug pagsunod sa mga credible nga impormasyon gikan sa ilang tagsa-tagsa ka DRRMO ug sa opisina sa Mayor.
Alang sa mga real-time nga impormasyon, giawhag ang publiko sa pag-follow sa official page sa Gobernador, sa ilang tagsa-tagsa ka mga Mayor, ug sa mga account sa Local DRRMO. Pinaagi sa pagkamabinantayon ug panaghiusa, masisiguro ang kaluwasan sa tibuok probinsya sa Sugbo.
Giluwat sa PAGASA kagahapon sa hapon, Enero 6, nga ang bagyong Basyang nilandfall na sa pipila ka mga dapit sa Probinsya sa Bohol.
Subay niini, gikabutyag ni Dr. Anthony Demalerio, ang pangu sa Bohol PDRRMO nga ang pipila ka mga dapit sa naasoyng probinsya, wala na kayo nakasinati og mga kusog nga bunok sa uwan, ug nakasinati nalang og ginagmayng pagtaligsik paggabii sa susamang adlaw,
Mao kini ang nahimong pamahayag ni Demalerio atol sa ekslusibong pakighinabi sa Bombo Radyo Cebu newsteam kaniya, diin iyang gidugang nga nilabay na o nahuman na nga ni landfall si Bagyong Basyang sa Bohol, ug nataho na usab kini niya ni Bohol Governor Aris Aumentado nga adunay kapin s 4,000 ka pamilya ang nangbakwit, diin gilangkoban kini sa kapin 11,000 ka mga indibidwal.
Gidugang niini nga karong adlawa usab, Enero 7, adunay dakong purohan nga makauli na sa tagsa-tagsa ka panimalay ang maong gidaghanon sa indibidwal kay maayo naman ang Dagan sa panahon.
Giklaro usab ni Demalerio nga mapasalamaton sila sa Ginoo, gumikan kay wala man silay nataho sa ilahang gobernadora, ingun man sa Office of the Civil Defense sa bisan unsang insidente may kalabutan sa Bagyong Basyang, o bisan mga major distractions.
Ingun man nga wala sila maka dispatch og mga emergency response team, bisan paman nga sukad niadtong Huwebes, Enero 5, gisugdan na sa maong probinsya ang pagkanselar sa mga klase sa tanang pampubliko og pribadong tunghaan sa tanang lebel.
Gawas niana, ubos usab sa mando sa gobernador, suspendido usab ang pipila ka mga trabaho, pag akomodar og turista sa pipila ka mga tourist sites, water activities sama sa snorkeling ug uban pa.
